Насловна

Денеска градоначалниците на Скопје, Кисела Вода и Центар, Петре Шилегов, Филип Темелковски и Саша Богдановиќ го означија почетокот на градежните работи за изградба на продолжеток на улицата „Есенинова“.

„Новоизградената улица „Есенинова“ ќе биде долга 730 метри, со променлива ширина, односно, ќе има две коловозни ленти и тротоари од двете страни низ Кисела Вода, а потоа четири коловозни ленти пред влезот во Трета македонска бригада. Предвидено е да се постави улично осветлување со 20 столбови, нова водоводна и канализациска мрежа и да се дислоцираат постојните резервоари и бунари кои се наоѓаат на таа локација. Вредноста на договорот изнесува околу 71.000.000 денари со вклучен ДДВ, а рокот за изведба е 22 месеца. Улицата „Есенинова“ е од огромно значење за жителите на Кисела Вода, Аеродром и Центар, зашто претставува трето поврзување на урбаните делови на Аеродром и Кисела Вода. Булеварот „Трета македонска бригада“ со должина од 2,5 километри има само 2 поврзувања со Кисела Вода, едното преку булевар „Србија“ со булевар „Борис Трајковски“, а второто, познатото тесно грло кај „Тутунски комбинат“, кое воедно претставува поврзување на Аеродром и со Кисела Вода и со Центар. Со изградбата на „Есенинова“, ова тесно грло во сообраќајот ќе се растовари, ќе се скрати кружењето околу „Тутунски“, кое во периодите на најголемиот сообраќаен метеж трае од 5 до 10 минути. Ова ќе го почувствуваат и граѓаните кои патуваат од „Континентал“ во Гази Баба до „Рампа“ и „Чешма“ во Кисела Вода, а кои избегнувајќи го тесното грло кај „Тутунски“ кружат или преку булевар „Србија“ во Аеродром или преку булеварите „Крсте Мисирков“ и „Кочо Рацин“ во Центар.Така на пример, од „Чешма“ до „Континентал“ ако сега се патува 3 километри преку Центар или 8 километри преку Аеродром, преку трасата „Есенинова - Никола Карев – Беласица“ ќе се патува само 2 километра. Изразено во време, тоа на граѓаните им заштедува од 10 до 15 минути“ - соопштија од Градот Скопје

„Градот Скопје денеска започнува со пробивање на нов коридор, коридор кој што досега не постоеше на територијата на нашиот град, а кој што значи поврзување на неколку општини . Тоа е пробивање на улицата „Есенинова“ во габарит од 4 коловозни ленти, две велосипедски и две пешачки патеки, кои од „Чешма“ ќе излегуваат кај амбулантата „Пролет“, што значи дека ќе имаме директна конекција помеѓу општината Кисела Вода и општината Центар, а индиректно и со општините Аеродром и Гази Баба. Ова е коридор со кој очекувам, а и според сите анализи во Градот кои се направени кажауваат дека ќе се намали сообраќајниот метеж на крстосницата кај „Тутунскиот комбинат“, бидејки конекцијата која ќе ја имаме директно кон поранешното скопско сајмиште за граѓаните на Кисела Вода, на Аеродром и на Центар ќе значи многу побрзо патување, кратење за повеќе од десетина минути на времето за патување. Со ова очекувам да влијаеме и на намалување на загадувањето на амбиенталниот воздух. Оваа инвестиција изнесува  околу 71.000.000 денари со вклучен ДДВ - истакна Петре Шилегов, градоначалник на Град Скопје

„Со овој градежен зафат од страна на Градот Скопје на улицата „Есенинова“ ќе се реши еден од крупните проблеми кој го имавме во минатото. Едно од тесните грла во нашата општина ќе биде растеретено и нашите жители полесно ќе можат да комуницираат со останатиот дел од градот, полесно ќе може да пристигнуваат до општините Аеродром и Центар . Во изминатите три години покажавме дека заедно со Градот Скопје можеме да ги решиме крупните проблеми на жителите. Со заеднички напори и со инвестиции во инфраструктурата го олеснуваме животот на нашите сограѓани. Благодарност до Градот Скопје и до градоначалникот Петре Шилегов за оваа инвестиција. И во наредните година ипол, колку што е останато од нашиот мандат ќе покажеме како може домаќински да ги решаваме наталожените проблеми од минатото“ - изјави Филип Темелковски, градоначалник на Општина Кисела Вода

„Сакам да се заблагодарам на Градот Скопје за сите проекти кои досега заедно ги реализиравме и кои ќе продолжиме да ги реализираме во наредниот период, а кои се доста значајни во меѓусебната соработка, поврзување помеѓу општините. Ние како градоначалници на општините секогаш преземаме мерки за подобрување на инфрастурктурата, но нема да биде целосна сликата доколку ја немаме поддршката на Градот Скопје. Ова е еден голем проект што значи поврзување на три соседни општини коишто немаше да можат да го постигнат тоа поврзување доколку не беше инвестицијата која што ја започнува денеска Градот Скопје . Се надевам дека и во периодот што ни претстои без разлика што се соочуваме со корона вирусот кој ни ги отежнува дел од активностите кои ги имаме, во соработка со Градот Скопје ќе продолжиме да ги решаваме проблемите на граѓаните“ - нагласи Саша Богадановиќ, градоначалник на Општина Центар

На отпочнувањето на градежните работи заедно со градоначалниците присуствуваше и претседателот на Советот на Општина Кисела Вода, Дарио Шимиќ.

Општина Кисела Вода апелира до граѓаните да внимаваат кога минуваат на местото на работните активности, а воедно ги замолува за трпение додека се одвиваат градежните работи.   

• < Prev
• Next >