По повод 210 годишнината од раѓањето на светски познатиот поет Александар Пушкин по иницијатива на Меѓународната федерација на рускојазични писатели и Амбасадата на Русија во Република Македонија во соработка со општината Кисела Вода, на улицата ,,Пушкинова,, ќе се реновира постоечкиот парк кој ќе го носи  името  на Пушкин. Во овој парк ќе се постави и биста на големиот светски поет со постамент во облик на пресечена пирамида во висина од два метри додека самата бронзена биста ќе биде во висина од еден метар и тежина од 145 килограми. Бистата на Пушкин ќе биде изработена од рускиот автор Леонид Витник и донесена од Русија во Македонија во месец мај.
 
 -Конечно паркот на улицата Пушкинова, ќе го добие својот лик. Пушкин е светски позната личност и се надевам дека во соработка со Амбасадата на Руската Федерација и Меѓународната Федерација на рускојазични писатели овој проект успешно ќе се реализира.  За овој проект разговарав и со новиот градоначалник на Општината Марјан Ѓорчев кој во целост го подржува па оттука се надевам дека овој проект ќе има континуитет и дека на 6-ти јуни, на денот на раѓањето на Пушкин,  на свечен начин ќе го отвориме  - Паркот на Пушкин, -потенцираше  градоначалникот на општина Кисела Вода во заминување Џорџе Арсов

-Оваа година по повод 210 годишнината на раѓањето на Пушкин вакви бисти ќе бидат поставени и во Полска, Грција, Унгарија и Италија, а ваква биста веќе е поставена во Панама. Иако и во овие земји ќе се постават бистите на Пушкин во ниедна од нив не е изработен ваков голем проект со прекрасен парк, како во Македонија. Кога дојдов во општината Кисела Вода да ја иницирам мојата идеја за проектот Пушкин побарав бисер, а добив дијамант- на прес конференцијата истакна  Елена Силјановска од Меѓународната Федерација на рускојазични писатели. Инаку, на прес конференцијата присуствуваше и аташето на Руската Федерација.
Патеките на паркот ќе бидат во облик на крст, а во средината на крстот ќе биде поставен споменикот.  Едната страна на споменикот ќе завршува со бина на која ќе можат да се одржуваат разни манифестации. Паркот ќе има четириесетина канделабри кои ќе бидат во стилот од 19 век, околу 50 клупи, корпи за отпадоци, паркот ќе биде хортикултурно уреден, ќе има и две жардињери, а околу целиот парк ќе бидат посадени брези (како што била и околината на куќата на Пушкин).
Почнувајќи од оваа година на 6 јуни во паркот на Пушкин ќе се организираат и Пушкинови денови за што општината Кисела Вода има поддршка и од Министерството за култура.