Општина Кисела Вода известува дека од 1 септември започна кампањата на Агенцијата за храна и ветеринарство за бесплатна идентификација и регистрација на домашните миленици.
Се до 31 март идната година, односно до целосно искористување на набавената количина од 100 илјади микрочипови, сопствениците на домашни миленичиња можат истите бесплатно да ги микрочипираат во некое од 135-те ветеринарни друштва со кои Агенцијата има склучен договор. Кампањата ќе се спроведе по принципот „прв дојден, прв услужен“.
Микрочипирањето е безболно, а микрочипот се аплицира во пределот меѓу плешките. Микрочипот е мал електронски уред, како зрно ориз. Содржи информации за сопственикот на миленикот, расата на кучето, полот, за тоа дали е вакцинирано и кога е третирано со средство против паразити. Овие податоци во вид на низа од бројки, се внесуваат во електронски систем од каде се веднаш и брзо достапни.
Граѓаните кои во зададениот временски период нема да ја искористат бесплатната апликација за микрочипирање ќе треба да платат 800 денари само за микрочипот и дополнителни средства за апликацијата. Секој сопственик има законска обврска да го микрочипира својот миленик и доколку тоа не го стори предвидена е санкција од 30 евра во денарска противвредност. По завршувањето на кампањата Агенцијата ќе спроведе засилени контроли за да провери дали сопствениците извршиле идентификација и регистрација на нивните миленици.
Проверка дали некое домашно милениче е чипирано или не, ќе се прави доколку биде заловено и однесено во прифатилиште. Доколку се утврди кој е сопственикот на миленичето, ќе се стапи во контакт со него, а доколку не било микрочипирано, се плаќа казна од 50 до 75 евра. Микрочипирањето ќе помогне и при пронаоѓање на изгубени миленици. Кампањата за бесплатно микрочипирање на милениците е дел од тригодишната стратегија што ја донесе АХВ за да се обезбеди здравствена заштита и благосостојба на животните, но и за да се поттикне одговорното сопствеништво, како и да се намали бројот на кучињата скитници по улиците низ државата.
Списокот на ветеринарни друштва кои ќе вршат бесплатно микрочипирање на домашните миленици е достапен на следниот линк:
Please wait...
